Шымкент қаласы әкімдігінің жанындағы Құқық бұзушылық профилактикасы жөніндегі ведомствоаралық комиссияның және нашақорлыққа қарсы штабтың отырысы өтті.

Арнаулы және құқық қорғау органдарының басшылары мен жергілікті атқарушы органдардың басшылары қатысқан отырысқа Шымкент қаласы әкімінің бірінші орынбасары Қуаныш Асылов төрағалық етті. Күн тәртібінде адам саудасының алдын алу, бұрын сотты болған азаматтардың қайта қылмыс жасауын болдырмау, әуе және темір жол көліктерінде есірткі заттарының жолын кесу, нашақорлыққа қарсы спорттық іс-шараларды жандындыру мәселелері қарастырылды. Төраға атқарылған жұмыстардың барысымен танысып, қазіргі уақытта алдын алу шараларын жетілдіруде әзірленген ұсыныстарды талқыға салды.

Аумақтық полиция департаменті бастығының орынбасары А. Бейсенбаев адам саудасының жолын кесуде құқық қорғау органдарымен атқарылған жұмыстардың барысын баяндап, әлі де болса қала тұрғындарын ақпараттандыру жұмысын жандандыру қажеттіліктерін атап өтті. Аса мән беруді қажет ететін пробациялық бақылаудың қазіргі жай-күйі мен проблемалық мәселелерін аумақтық қылмыстық-атқару жүйесі департаменті бастығының орынбасары Е.Жалғасбаев баяндап, оны күшейтуде қабылданып жатқан шаралар бойынша ақпараттар берді. Күн тәртібіндегі мәселелер бойынша басқа да мекемелердің ұсыныс пен пікірлері тыңдалып, ортақ ұйғарымға келісті.

Отырыс қорытындысы бойынша қала әкімінің бірінші орынбасары жұмыстарды барынша күшейту, мекемелер арасындағы өзара іс-қимылды жандандыруға қатысты бірқатар тапсырмаларды берді.