Мемлекет басшысы Қасым Жомарт Тоқаев Президенттікке сайланған алғашқы жылынан-ақ білім беру ісіне, жастар саясатына, өскелең ұрпақтың тәрбиесіне баса мән беру қажеттігін айтып келеді.
Мәселен, 2019 жылы Астанадағы Тәуелсіздік сарайында өткен тамыз конференциясында: «Дәстүрге айналған тамыз конференциясы – ұстаздар қауымы бас қосатын ауқымды әрі маңызды жиын. Мен бүгін сіздермен кездесу үшін осы жиынға арнайы келіп отырмын. «Білімдіден шыққан сөз талаптыға болсын кез» деп ұлы Абай айтқандай, ұстаз әрқашан ілім мен ізгілікті алға қоятын тұлға. Ұлағатты ұрпақ тәрбиелеу аса жауапты әрі күрделі міндет. Сіздердің арқаларыңызда тұтас бір буынның құндылықтары мен қасиеттері қалыптасады. «Ұстазы жақсының ұстанымы жақсы» деген халқымыз. Ұстазсыз адам болмайды. Бәріміз де кезінде мұғалім тәлімін алып, білімін үйрендік. Сондықтан болашаққа жол сілтейтін мұғалім еңбегін лайықты бағалау өте маңызды міндет» деп, білім берушілер алдында ұрпақ тәрбиесінің маңыздылығына айрақша тоқталып кеткен еді. Еліміздің түкпір-түкпірінен келген екі мыңнан астам мұғалім қатысқан конференция барысында білімді жаңғырту бойынша әдістемелік ұсыныстар әзірлеп, білім беру жүйесінің мазмұнын жаңғырту аясында оны дамытудың негізгі бағыттары айқындалған еді.
Иә, елдің ең бірінші келбеті – жастар тәрбиесінде ұстаздың алар орны ерекше. Өскелең ұрпақтың білімі бірінші орында екені де даусыз. Мемлекет басшысының тапсырмаларына сәйкес елімізде білім беру ісі күннен-күнге дамып келеді. Бұл ретте үшінші мегаполис Шымкент қаласы да басқа өңірлерден қалыс қалмай, алдыңғы қатардан көрініп отыр. Шырайлы қалада орналасқан білім ошақтарының бірі – Жұмабек Тәшенев атындағы университет. Оның тарихы мен бастауы осыдан жиырма үш жыл бұрын «Сырдария» университетінің құрылуынан басталады. 1998 жылы қазіргі Түркістан облысының Жетісай қаласында еліміздің оңтүстік өңіріндегі шалғайдағы жастарды жоғары білім алуға тарту мақсатында «Сырдария» университеті ашылды. Жиырма үш жыл ішінде бұл оқу орны тарихы терең, өзіндік дәстүрімен қалыптасқан, алдыңғы қатарлы жекеменшік жоғары оқу орындарының біріне айналды. Ширек ғасырға жуық тарихы бар Сырдария университеті сан алуан білім беру бағдарламаларын ұсынатын білім мен ғылымның ордасы болды. Кейіннен 2022 жылы Үкімет пен Ғылым және білім министрлігінен аталған университетті Шымкентке көшіру туралы ұсыныс түсті. Қазіргі таңда университетте төрт факультет, он бес кафедра бар. Білім ордасы жастардың қоғам өмірінде белсенді болуына мүмкіндік жасап, бағыт-бағдар беріп келеді. Осы орайда былтыр жастарға жолдаған Үндеуінде Президент Қазақстанның қандай ел болары өскелең ұрпаққа байланысты екенін айтқанын еске сала кетелік. Мемлекет басшысының сөзінше, еліміздегі саяси және әлеуметтік-экономикалық реформа қоғамдық сананың түбегейлі өзгерісіне ұласуы керек. Республика күні қарсаңында Ақордада өткен мемлекеттік наградалар мен сыйлықтар тапсыруға арналған салтанатты рәсімде бұл туралы: «Мен бұған дейін Адал азамат ұғымын ұсындым. Осы орайда жастарымызға арнайы үндеу жолдағым келеді. Елімізде жүзеге асырылып жатқан әрбір бастама, ең алдымен, сіздерге арналады. Қазіргі реформалардың игілігін көретін де, елдік істерді жалғастыратын да – сіздер», – деді. Мемлекет басшысының айтуынша, жастар – еліміздің ең бірінші келбеті. Осы ретте Қазақстан жастары қандай болуы керек екені де айтылды. «Шын мәнінде, кез келген мемлекетті тұрғындарына қарап бағалайды. Яғни, біздің қандай ел боларымыз өскелең ұрпаққа байланысты. Сондықтан жастарымыз отаншыл, білімпаз, еңбекқор, үнемшіл, әділ әрі жанашыр болуы қажет. Жастар спортпен, дене шынықтырумен айналысуы керек. Мен мұны үнемі айтып жүрмін. Осы құндылықтарды барынша насихаттап, тарату қажет. Сонда жеке адамның қасиеті тұтас ұлттың қасиетіне айналады», ¬– деген еді Мемлекет басшысы. Сондай-ақ Президент өскелең ұрпақты «жақсыдан үйренуге, жаманнан жиренуге», ұлы Абай айтқан «бес нәрседен қашық, бес нәрсеге асық болуға» шақырды. Ол туралы: «Сіздер дәріптеген құндылықтар қоғамда тез орнығады. Сіздер қолдаған өзгерістер жылдам жүзеге асады. Бәріміздің тілегіміз – бір, бұл – қоғамымызда жаппай әділеттік орнату. Ендеше, мақсатымызға бірге жетейік. Мен жас ұрпақтың жасампаздық қуатына сенемін. Өздеріңіз сияқты саналы ұл-қыздары бар Қазақстан өркениет көшінің басында болары сөзсіз», – деп сенімін сүйіспеншілік сезіммен жеткізген.
Еліміздің өркениет басында болуына мүдделі жастар білім алып жүрген Ж.Тәшенев атындағы университетте жүйелі жұмыстар мен оң нәтижелер, жақсы жаңалықтар жетерлік-ақ. Ендеше, соңғы жаңғалықтарының бірқатарына тоқталып өтейік. Жақында Жұмабек Ахметұлы Тәшенев атындағы университет мемлекеттік-жекеменшік серіктестігі аясында білім алушылардың игілігі үшін жаңа Студенттер үйінің ашылу салтанатын өткізді. Төрт қабаттан тұратын, жаңа үлгіде салынған Студенттер үйінде қолжетімді, төмен бағамен әлеуметтік дүкен, студенттер асханасы, заманауи би алаңы, кір жуу бөлмесі, интернет желісімен жабдықталған оқу залы білім алушыларға қызмет көрсетеді. Бір ерекшелігі – барлық бөлмелер мен жүріп-тұру алаңдарына жарық түседі. Шымкент қаласының Бәйдібек би даңғылы бойында 2024 жылдың шілде айында қолданысқа берілген 150 орындық жаңа жатақханаға студенттер тамыз айынан бастап орналастырылған. Концерттік бағдарламамен өткізілген Студенттер үйінің ашылу салтанатында Жұмабек Ахметұлы Тәшенев атындағы университеттің басқарма төрағасы, ҰҒА академигі, педагогика ғылымдарының докторы, профессор Оңалбай Аяшұлы, университет ректоры профессор Қанат Байболов, Өзбекәлі Жәнібеков атындағы Оңтүстік педагогикалық университетінің ректоры міндетін атқарушы Гүлжан Сүгірбаева, Стратегиялық даму және әлеуметтік мәселелер жөніндегі проректор Баршагүл Исабек, жеке кәсіпкерлер Қасымбай Жаханұлы, Хиллола Анарметова лента қиып, студент жастарға ізгі тілектерін білдірді.
Білім ордасындағы бар игілік студенттер үшін. Білім алушылардың сапалы біліммен қамтамасыз етілуі үшін жеткілікті жағдай жасалған. Оқытушылар да осал емес. Шетелдерде білім алып келген ұстаздардың адал еңбегінің нәтижесінде бүгінде мақтанарлық студенттер де көбейіп келеді. Бұдан бөлек, таяуда ғана Студенттер күніне орай «Tashenev tandauy-2024» атты студенттік арнау кеші ұйымдастырылды. Өздерінің құрметіне арналған кешке жиналған жастардың жүздерінде күлкі, үстерінде мерекелік киім. Тілші ретінде бұл кешке біз де арнайы бардық. Қатар-қатар тізілген студенттер табалдырықтан аттағанымыз сол еді, ізет көрсетіп, жылы жымиып, қарсы алды. Ынтымақ-бірліктері көрініп-ақ тұр. Жүріс-тұрыстары, әрқайсысының жеке-жеке келіп сәлемдескендері жаныңды жылытып, сүйсінтеді. Арнайы ұйымдастырылған кешке университеттің негізін қалаған, ҰҒА акедемигі, профессор, Түркістан облысының құрметті азаматы Оңалбай Аяшев, университет ректоры Қанат Сейтжанұлы және де проректорлар мен факультет декандары қатысты. Оқытушылар студенттерді мерекесімен құттықтап, оқуда озат болуға, елдің азаматы болып өсуге шақырды. Бірқатар оқуда озат студенттерді марапаттап, өз орталарында үлгі етіп көрсетті. Студенттер мен оқытушылар арасындағы сүйспеншілікті, сыйластықты, махаббатты байқадық. Арнайы ұйымдастырылған кеште сол махаббаттың, ынтымақ-бірліктің одан әрі бекемделе түскені де анық. Студенттік арнау кешінде студенттер өз өнерлерін көрсетіп, бірі ән салса, екіншісі әдебиет әлеміне ендіріп өлең оқыды. Елімізге танымал жас әнші Әділет Жауғашар жастардың сүйікті әндерін орындап берді.
Жалпы, биылғы қабылдау нәтижесінде университетте 20 – Алтын белгі, 50 – Үздік аттестат, 8 – Елбасы медалі, 14 халықаралық және республикалық олимпиада жеңімпаздары және 12 IELTS сертификаттарын иеленген оқу озаттары таңдау жасап, студент қатарына қабылданған. Мемлекеттік грант нәтижесінде – 96, «Тәшенев тартуы» бойынша – 150, «Қазақстан Халқына» Қоры бойынша – 5, қала әкімінің грантын – 49 студент иеленді.
Аида ӨТЕП
