Мемлекет басшысы Қасым-Жомарт Тоқаев 2 қыркүйекте халыққа дәстүрлі Жолдауын жолдағаны белгілі. Аталған жолдауға байланысты Шымкент қаласы мәслихатының депутаты, AMANAT партиясы фракциясы жетекшісінің орынбасары Талғат Балтабаев өз пікірін ортаға салды.
«Құрғақ сөздің емес, нақты істің адамы ретінде халық Президенттен жақсы хабар, тың бастама күтті. Және сол үміт ақталды деп айта аламын. Қоғамда «Президент барлық мәселені шешеді» деген түсінік бар. Бұл қате. Барлық істің бастауында мемлекет басшысы тұратыны анық. Бірақ көтерген мәселе, алға қойған мақсат міндеттердің жүзеге асуы сіз бен бізге яғни, қоғамға тікелей байланысты. Ендігі кезекте Президенттің «Әділетті Қазақстан: заң мен тәртіп, экономикалық өсім, қоғамдық оптимизм» атты халыққа арнаған Жолдауындағы басым бағыттарды орындауда бізге бір үйдің баласындай қатар тұрып қызмет ету міндеті тұр», - деді Т.Балтабаев.
Президент Жолдауында «Қазақстан халқы қазір мүлде жаңа саяси жағдайда өмір сүруде. Соңғы 5 жылда ауқымды реформалар жасалды. Еліміздің саяси жүйесі түбегейлі өзгерді. Жұрттың сана-сезімінде бетбұрыс болып жатыр. Халықтың құқықтық мәдениеті артып келеді. Азаматтардың бойында жаңа әдеттер, дағдылар қалыптасып, жаңа құндылықтар орнығуда. Саяси және қоғамдық болмысымыз, менталитетіміз және мәдени кодымыз өзгере бастады»,- деген болатын. Мәслихат депутаты бұл тұжырымға келісетінін айтты.
«Бұл тұжырымға ешқандай талас жоқ. Бірақ біз осы жетістікті қанағат тұтып, келесі мәселені жылы жауып қоя алмаймыз. Атап айтқанда, NEET санатындағы жастар, өскелең ұрпақ арасында синтетиткалық есірткіге тәуелділік пен ерте жүктілік проблемасын түпкілікті шешу. Мемлекет басшысының «Тағы бір маңызды міндет – есірткі саудасына және нашақорлыққа қарсы күрес. Бұл – ұлттың генетикалық қорын аман сақтап қалу мәселесі деген сөз. Біз осыған дейін қажетті заңнамалық шараларды қабылдадық. Бірақ, нақты нәтижеге қол жеткіздік деуге әлі ерте. Әрбір мемлекеттік құрылым, әсіресе, құқық қорғау органдары тиімді жұмыс істеп жатыр деп айта алмаймыз. Есірткі мәселесі ушығып барады»,- деп шегелеу арқылы, бүгінгі күннің басты тақырыбын дөп басты. Мәслихат депутаты ретінде мен бұл мәселені талай мінберде бірнеше рет көтеріп, кейбір жағдайларда құқық қорғау органдары сылбыр қимылдап, селқос танытып жатқанын ашып айтып келемін. Президенттің құқық қорғау органдары басшыларына қарата айтылған бұл ескертуі осы бағыттағы жұмыстарды ширатып, көптеген мәселенің шешімін табуға ықпал етеді деп білемін. Себебі бұл мемлекет басшысы айтқандай, еліміздің әлеуетін күшейтуде маңызды мәнге ие», - деді ол.
Сонымен қатар, биылғы жолдауда айрықша аталған мәселелерге де тоқталып өтті.
«Бұл жолғы Жолдауда аймақтарда болып жатқан проблемалардың барлығы көтеріліп, оны шешудің нақты жолдары айтылды. Мәселен, мемлекет басшысы «...Біз өркениетті ел болуға кедергі жасайтын жағымсыз әдеттерден арылуымыз керек. Мен бұл туралы Ұлттық құрылтайдың отырысында айттым. Елдің болашағына кесірін тигізетін бес кеселге тоқталдым. Содан бері біршама жұмыс атқарылды. Вандализмге, лудоманияға тосқауыл қоятын заңдар қабылданды. Вейпке, яғни электронды темекіге тыйым салынды. Қабылданған шаралардың нәтижесі қазірдің өзінде көрініп жатыр»,-дей келе, дегенмен де мұндай әлеуметтік кеселдің бәрімен тұтас жұрт болып жұмыла күресу қажеттігін баса айтты.
Тәртіп бар жерде, тиянақтылық бар. Дегенмен де біз қауіпті алдын алуды тек мемлекетке артып қоймай, әрбіріміз оған өзіндік қолтаңба қалдыруымыз керек. Президент айтқандай жастары мәдениетті, жаңашыл әрі жасампаз ұлт қалыптастыруда әрбір ата-ананың, мектептегі ұстаздардың рөлі зор екенін терең түсінуіміз керек», - деді Мәслихат депутаты.
