Шымкент қаласындағы Металлург стадионы аумағында жастар арасында құқықтық мәдениетті қалыптастыруға бағытталған ауқымды профилактикалық іс-шара өтті. Жиынға студент жастар, «Жас сарбаз» әскери-патриоттық қозғалысының мүшелері және өзге де қатысушылар жиналып, қоғамдағы заң мен тәртіптің маңызы жөнінде маңызды мәліметтер алды.
Іс-шара «Заң мен тәртіп» идеологиясын ілгерілету және Халықаралық нашақорлыққа және есірткі бизнесіне қарсы күрес күніне орай ұйымдастырылды. Ұйымдастырушылардың айтуынша, мұндай кездесулердің басты мақсаты – жастар арасында құқық бұзушылықтың алдын алу, салауатты өмір салтын насихаттау және заңға құрметпен қарау мәдениетін қалыптастыру.
Қазіргі таңда қоғам алдында тұрған өзекті мәселелердің бірі – жастардың теріс әдеттерге әуестенуінің алдын алу. Әсіресе есірткіге тәуелділік пен интернет арқылы таралатын заңсыз әрекеттер жасөспірімдер мен жастар үшін үлкен қауіпке айналып отыр. Осыған байланысты жиын барысында құқық қорғау органдарының өкілдері зиянды заттардың адам денсаулығына тигізетін зардабы, заң алдындағы жауапкершілік және құқықтық сауаттылықтың маңызы жөнінде кеңінен түсіндірді.
Кездесу аясында жастар полиция қызметінің жұмысымен танысып, құқық қорғау саласының күнделікті қызметі туралы мәлімет алды. Арнайы көрсетілім-қойылымдар ұйымдастырылып, құқық қорғау органдары пайдаланатын арнайы техникалардың мүмкіндіктері таныстырылды. Мұндай тәжірибелік шаралар жастардың қызығушылығын арттырып қана қоймай, олардың қауіпсіз қоғам қалыптастырудағы тәртіп пен заңның рөлін терең түсінуіне мүмкіндік берді. Бүгінгі таңда құқық бұзушылықтың алдын алу тек жазалау шараларымен шектелмеуі керек. Ең маңыздысы – жастардың санасында заңға құрмет пен азаматтық жауапкершілікті қалыптастыру. Бұл бағытта құқық қорғау органдары, білім беру ұйымдары мен қоғам өкілдерінің бірлескен жұмысы ерекше маңызға ие.
Іс-шара барысында студент жастар құқық қорғау органдары қызметкерлеріне сұрақтарын қойып, құқықтық мәселелер жөнінде пікір алмасты. Әсіресе жастардың интернет кеңістігіндегі қауіп-қатерлерге, дропперлік, есірткі тасымалы және жеңіл табыс ұсынатын күмәнді ұсыныстарға алданып қалмауы жөнінде нақты түсіндіру жұмыстары жүргізілді.
Жастар тәрбиесі – қоғамның болашағына салынған инвестиция. Сондықтан мұндай профилактикалық кездесулер жас буынның құқықтық сауатын арттырып қана қоймай, оларды отансүйгіштікке, тәртіпке және жауапкершілікке тәрбиелеуде маңызды рөл атқарады.
