Түркістан облысының орталығы Түркістан шаһарында салынып жатқан елімізде теңдесі жоқ спорт кешенінің құрылысы халықаралық талаптарға сай жүргізілуде. Жалпы ауданы 100 гектарға жуық алаңда орналасқан су спорты кешенінде ұзындығы 2,5 шақырымға созылатын су арнасы болады.  Келер жылы ашылатын әмбебап оқу жаттығу базасында жоғары деңгейдегі жарыстар өткізу жоспарланған. Бұл туралы облыс әкімі Өмірзақ Шөкеевтің қаладағы құрылыстарды аралау барысында айтылды. 

Мемлекет басшысы биыл 1 қыркүйектегі Қазақстан халқына арнаған «Халық бірлігі және жүйелі реформалар – ел бірлігінің берік негізі» атты Жолдауында спорт түрлерімен айналысудың халыққа қолжетімді болуы керектігін атап тапсырды. Өйткені спорт – саламатты өмір салтының негізі. 

Халықаралық дәрежедегі ескек есу жəне байдарка спорты бойынша олимпиадалық стандартқа сай орталықта қонақүйлер, бассейн, эллинг, каноэге арналған пирстер, көрермендерге арналған жай, көпірлер салынады. Спорт кешенінде сапбординг, су шаңғысы, флайбординг, вейксерфинг, канополо, драгонбот және жағажай ойындар футболы, волейбол, гандбол, регби секілді су және жағажай спортының танымал түрлерінен сайыстар өтеді. 

Түркістан қаласында сондай-ақ «Теннис орталығы», Олимпиадалық резерв мектебінің әкімшілік ғимараты мен жатақханасы, Б.Саттарханов спорт мектебі, «Ат спорты кешені», «Мұз айдыны» секілді жаңа спорт нысандары салынуда. Облыс әкімінің тікелей бақылауымен бой көтерген әлемдік стандарттарға сай мұз айдыны 1200 адамға есептелген. Жаңа нысандар келер жылы ашылады. 35 гектар жерде орналасқан ат спорты кешенінде Поло-клуб, манеж, стендтік атысқа арналған алаңқай, садақ атуға арналған алаң, канал арқылы өтетін көпір мен атпен серуендеу аймағы салынады.