Биыл өңірлерді нығайтуға 7,7 трлн теңге қарастырылған. Бұл туралы елордада Сенат жанындағы мәслихаттармен өзара іс-қимыл жөніндегі кеңестің отырысында Қаржы министрі Мәди Такиев мәлім етті деп жазады ҚазАқпарат.

- Өңірлік деңгейде нақты экономикалық белсенділік қалыптасып жатыр, жұмыс орындары ашылып, халықтың өмір сүруіне қолайлы жағдай қамтамасыз етіліп отыр. Биыл өңірлерді нығайтуға 7,7 трлн теңге қарастырылғанын атап өткен жөн. Бұл көрсеткіш Республикалық бюджеттің 30 пайызын құрайды. Жалпы, 2025 жылға арналған жергілікті бюджет шығыстары 19,3 трлн теңгеге жетті. Бірақ біз үшін мәслихаттарды тек қаржыландырумен ғана емес, сол сияқты оны пайдалану және бақылаудың тиімді құралдарымен қамтамасыз ету маңызды, - деді М. Такиев.

Министр жыл басынан бері елімізде «Мемлекеттік сатып алу туралы» жаңа Заң күшіне енгенін еске салды. Оның негізгі мақсаты – сатып алынатын тауарлардың, қызметтердің сапасын арттыру, рәсімдерді жеңілдету және оларды одан әрі автоматтандыру. Біріншіден, сатып алу рәсімдерінің мерзімдері айтарлықтай қысқарды.

- Өңірлердің мүмкіндіктері туралы айтқанда, салық жүйесін де ескерген жөн. Жаңа Салық кодексінің жобасы былтырдан бері Парламентте талқыланып жатыр. Жалпы, жобада салықтардың, алымдар мен төлемдердің санын, сондай-ақ салық есептілігінің санын қысқарту шаралары ескерілген. Тиімсіз салық жеңілдіктері алынып тасталды және олардың мерзімдері шектелді. Бұдан басқа, олардың тиімділігіне жыл сайын талдау жүргізілетін болады. Бұл не үшін қажет?

Бүгінгі күні салық жүктемесін азайту үшін ірі және орта бизнес ұсақталу схемаларын кеңінен қолданады. Соның салдарынан ел ішінде жасанды оффшорлық аймақтар пайда болып, жалған компаниялар көбейді, ал экономика қомақты табысынан айырылып отыр... Сондықтан салық реформасы тек салық жинауға ғана емес, адал бизнестің дамуы үшін тең жағдайларды қамтамасыз етуге, жергілікті бюджеттерді нығайтып, әлеуметтік-экономикалық дамудың негізін салатын тиісті экономикалық орта жасауға бағытталған, - деді ведомство басшысы.