СИМ Тұтынушылардың құқықтарын қорғау комитетінің төрағасы Асқар Тынысбеков жаңа заң жобасына қандай тың нормалар енгенін айтты деп жазады  ҚазАқпарат.

— Заң жобасы Мемлекет басшысының тапсырмасымен әлеуметтік зерттеулердің, қоғам өкілдерінің шағымдарына жасалған мониторинг пен сараптамалардың нәтижелеріне, қоғамдық институттардың ұсыныстары мен пікірлеріне сүйене отырып жасалды. Өткен жылдың 4 қыркүйегінде оны Мәжіліс депутаттары бірінші оқылымда мақұлдады, — деді ол ОКҚ алаңында.

Спикердің айтуынша, жаңа заңда бірқатар жаңалық бар. Атап айтқанда мына бағыттарда жаңа нормалар енгізілді: 

— Қорғаныс тәсілдерін еркін таңдау және тұтынушылардың шағым түсіруін жеңілдету (кедергілер мен бюрократиялық сатылар алынып тасталды);

— Тұтынушылардың құқықтарын қорғау жөніндегі қоғамдық институттардың рөлін күшейту, соның ішінде осы салада Омбудсмен институтын енгізу;

— Адам өмірінің барлық саласында кешенді қорғаудың негізгі қағидаттарын кеңейту;

— Кәсіпкердің азаматтық-құқықтық жауапкершілігін енгізу (өндірілген талап сомасының 10%-дан 50%-ға дейінгі мөлшерінде айыппұл енгізу), оны сот азаматтық процесс аясында тұтынушының пайдасына өндіреді;

— Онлайн саудадағы тұтынушылардың құқықтарын қорғауды күшейту және басқа нормалар.

Бұған дейін елімізде тұтынушылар құқығын қорғау омбудсмені институты құрылатынын жаздық. 

Сондай-ақ, тұтынушы енді шағымданудың міндетті 4 сатысынан өтпей, бірден сотқа арыздана алады. 

Маркетплейстерге де жауапкершілік жүктелетін болады.