Елімізде ерекше қорғалатын 6 табиғи аумақ құрылады. Бұл туралы Орталық коммуникациялар қызметіндегі брифингте Экология және табиғи ресурстар министрлігі Орман шаруашылығы және жануарлар дүниесі комитетінің төрағасы Данияр Тұрғамбаев айтты.

- Биологиялық әртүрлілікті сақтап қалу жөніндегі конвенция аясында Қазақстан Республикасының міндеттемелерін іске асыру мақсатында «Елімідің биоәртүрлілікті сақтау тұжырымдамасын» әзірлеу жұмыстары жүргізілуде, Тұжырымдаманың жобасы ел аумағында ерекше қорғалатын табиғи аумақтардың алаңын 12,5 пайызға дейін жеткізуге мүмкіндік береді. Бүгінгі күні ол 11,3 пайызды құрайды, - деді Данияр Тұрғамбаев.

Осы ретте ол 6 ерекше қорғалатын табиғи аумақ құру жоспарланып отырғанын айтады. Олар: Арал, Жайық орманы, Ертіс жайылмасы табиғи резерваттары, Түкті ұлттық паркі, Мерке өңірлік паркі және Қызылқұм қорығы. Мұнан бөлек Үстірт, Қаратау қорықтарының, Ақжайық және Иле Балхаш резерват аумақтарын кеңейту көзделгенген.

- Ұлттық парктердегі экологиялық туризм – бұл қоршаған ортаға минималды әсер ете отырып, табиғи аумақтарды танып-білуге бағытталған жауапты саяхат. Соңғы жылдардағы статистикалық деректер туристер санының біртіндеп өсіп келе жатқанын көрсетеді. Мәселен, 2024 жылы Ерекше қорғалатын табиғи аумақтарға шамамен 2,8 миллион адам барған, бұл 2023 жылмен салыстырғанда 400 мыңға көп, - деді комитет басшысы.