Шымкенттегі Қонаев даңғылын ұзарту жұмыстары жалғасуда. 2020-2025 жылдарға арналған «Нұрлы жол» инфрақұрылымдық даму мемлекеттік бағдарламасы аясында құрылыс жұмыстары өткен жылы басталған болатын. Биыл бұл жұмысты жалғастыру үшін қазынадан 269,580 млн.теңге қарастырылған.

Көшенің ұзындығы 58 шақырымды құрамақ. Ал, ені 6 жолақты 23 м болады деп жоспарлануда.

Осы ретте қазіргі таңда көше тұрғындарымен түсіндірме жұмыстары жүргізілуде. Бұл туралы Шымкент қаласы әкімінің орынбасары Мақсұт Исахов фейсбук әлеуметтік желісінде жазды. 

– Құрметті қала тұрғындары! Өздеріңіз білетіндей қазіргі таңда Қонаев даңғылының жалғасын кезең-кезеңімен салу бойынша құрылыс жұмыстары жүргізіліп жатыр. Келесі кезеңде Ескі автовокзал аталып кеткен көне қалашық маңындағы Володарский көшесінен Амангелді көшесіне дейін және Әйтеке би көшесінің Тоқаев бағытына қарай бөлігін жабуды жоспарлап отырмыз, - деді қала әкімінің орынбасары. 

Бұл ретте, Мақсұт Исахов бүгін аталған құрылыс бойынша осы маңайдың тұрғындарымен кездесіп, түсіндірме жұмыстары жүргізілгенін мәлім етті. 

– Өз тарапымыздан жаңа орындар мен тиімді жақтарын ұсындық. Мұндағылардың көбісі құрылыс заттарын сатумен айналысып, жол бойын жағалай базар қалыптастырған. Өздеріңіз білесіздер, қаланың ішінде базардың болуы тиімсіз. Кептелістер, у-шу, ластануы бәрі әсер етеді. Қаланың сәнін кетіреді. Қазір кәсіпкерлердің жекеменшігін мемлекет иелігіне қайтару процестерін атқарып, балама ретінде индустриалды аймақтан 6 ай тегін жалға алуға және 5 жылға дейін тұрақты бағамен келісімшарт ұсынып жатырмыз. Болашақта бұл орындарда Ескі қалашық, Арбат және Қонаев магистральды жолы қалыптасады, - деді Мақсұт Пернебайұлы. 

Айта кететйік, «ОтауСтрой» ЖШС-і қолға алған бұл жоба жыл соңы желтоқсан айында аяқталмақ. Мәдени қаладағы Қонаев гүлзары Түркістан көшесінен Темір жолға дейін жалғасады.