Сайрам ауданында биылғы жылдың 6 айында жалпы өңірлік өнім көлемі 62 млрд. теңгеге жетсе, оның 48%-ы ауыл шаруашылығы саласына тиесілі. Атап айтқанда, ауыл шаруашылығы саласында 30 млрд. теңгенің өнімі өндіріліп, өнім көлемі былтырғы жылға қарағанда 1,5 млрд. теңгеге артқан. Биыл ауданда жалпы ауыл шаруашылығы өнімдері көлемін 100 млрд. теңгеге жеткізу жоспарланған. Бұл туралы аудан әкімі Ұласбек Сәдібеков брифингте мәлімдеді.

Ауданда жаңадан 101 гектар жерге тамшылатып суару жүйесі ендіріліп, оның жалпы көлемі 601 гектарға жеткен. Жылыжайлардың жалпы көлемі 52 гектарды құраса, қарқынды бау 20 гектар жерге егіліп, көлемі 500 гектарға жуықтаған.

- «Биылғы жылы ауданда ауыл шаруашылығы саласында 4 жаңа жоба іске асырылады. Олар: Қайнарбұлақ ауыл округіндегі «Нұр Агро» ЖШС 1,5 гектарлық жылыжай кешені, жобаның жалпы құны – 1 млрд. теңге. Сондай-ақ, «Көмешбалық» ЖШС жылына 900 тонна балық өнімін өндіретін шабақ өсіру жобасын қолға алып отыр. Оның құны – 50 млн. теңге. Сонымен қатар, Көлкент ауыл округіндегі «Food production LTD» ЖШС-нің 29 гектарлық қарқынды бау кешені, жоба құны – 400 млн. теңге, Манкент ауыл округіндегі «Туран Агро Ет-Сүт» өндірістік кооперативінің сүтті қайта өңдеу цехы, жоба құны – 100 млн. теңге. Жобаларды іске асыру барысында қосымша 6 млрд.-тан астам теңгенің ауыл шаруашылығы өнімдері өндіріліп, жаңадан 380 жұмыс орны ашылады» - деді Ұласбек Сәдібекұлы.

Ауданда барлық шаруашылықтарда мал басы көбейген. Алты айда ет өндірісі 9,3%-ға, сүт – 5%-ға, жұмыртқа 5,5%-ға артып отыр. Жыл басынан аудан кәсіпкерлері алыс-жақын шетелдерге жалпы көлемі 9 250 тонна ет экспорттаған, бұл былтырғы жылға қарағанда 4,5 мың тоннаға артық. Жалпы, ауданда жылдан-жылға мал бордақылау алаңдары артып келеді. Мәселен, аудандағы 1 012 мал бордақылау алаңы бір мезетте 42 мың мал бордақылай алады.