Түркістан облысында соңғы жылдары спортқа қызыққан жастардың қатары көбейіп келеді. Ауылды жерлердің өзінде спорт нысандары қолжетімді бола түсуде. Спорт алаңдары мен залдардың көбеюі «Рухани жаңғыру» бағдарламасының «Алтын ұям» жобасының септігі тиюде.  Атамыш жоба аясында бүгінде кәсіпкер әрі демеуші азаматтар туған ауылдарына жаттығу және футбол алаңдарын, спорт кешендерін салуды жақсы үрдіске айналдырды. Түркістан облысы әкімінің баспасөз қызметінің мәліметінше 2019 жылдың сәуірінен бері өңірде 10 спорттық нысан ашылып,біреуі толық жөндеуден өтіпті.

Мәселен, Сарыағаш ауданы, Ақжар ауылдық округінде спорт кешені салынса, Таскескен елді мекенінде шағын футбол алаңы ашылған. Бәйдібек ауданы, Кеңес елді мекенінде футбол, волейбол, баскетбол алаңы және балалар алаңшасы пайдалануға берілген. Сондай-ақ осы ауданда жабық футбол кешені жұмысын бастады. Ордабасы ауданы, Төрткөл елді мекенінде «Түзелбек ата» жабық спорт кешені ашылды. Оған демеушілер 20 млн. теңге көлемінде қаржы жұмсаған. Осы аудандағы Қарақұм және Бөген ауылдарында да спорт кешені мен футбол алаңы бой көтерді. Төлеби, Шардара аудандарында да спорт кешендері ашылды.Түркістан облысы аумағында алдағы уақытта да «Туған жер» жобасы аясында осындай игі істер жалғасын табады.