Қырғызстанның Талас облысы Талас ауданында 28 наурыз күні болған жер сілкінісінен 48 үйге зақым келгені анықталды, деп хабарлайды Кавар.

Қырғыз Республикасы Төтенше жағдайлар министрлігінің баспасөз қызметі мәлім еткендей, төтенше жағдай болған күннен бастап азаматтық қорғаныс комиссиясы зақым келген үйлерді анықтау жұмыстарына кірісті. Қазіргі уақытта 48 үйдің зақымдалғаны белгілі болды. Тексеріс қорытындысы бойынша акт толтырылды. Комиссия деректеріне сәйкес 48 үйдің 31-і сақтандырылған көрінеді.

Осылайша:

• Копуро-Базар ауылында — 26 үй;

• Арал ауылында — 12 үй;

• Уч-Эмчек ауылында — 2 үй;

• Шумкар-Уя ауылында — 6 үй;

• Манас ауылында — 1 үй;

• Кок-Ой ауылында — 1 үйде зақымдалу дерегі тіркелді.

Еске салсақ, 28 наурызда Жамбыл облысында екі рет жер сілкінді. Есептелген қарқындылығы Меркі ауылында — 5.0 балл, Құлан ауылында — 4.0 балл, Шу қаласында — 2.0 балл шамасында болған. Бұл ретте жер сілкінісінің ошағы Қырғызстан аумағында орналасқаны хабарланды.

Табиғи апат салдарынан Тұрар Рысқұлов ауданы Қарақыстақ ауылындағы мәдениет үйі, Меркі аудандық ауруханасы, Ойтал ауылындағы мектеп ғимаратының қабырғасында жарықшақ пайда болғаны анықталды.

Ал «ҚазАвтоЖол» Жамбыл облысындағы жер сілкінісінен кейін жасанды құрылыстарға еш зақым келмегенін атап өтті.