Мемлекет басшысы өз жолдауында Кәсіпкерлікке қолдау көрсеткенде орта бизнеске де ерекше назар аудару керектігін баса айтқан болатын. Себебі, нарықта табысты болудың негізгі көрсеткіші орта бизнестің өркендеуімен өлшенеді.  

- Мұндай компаниялар ішкі нарыққа қана емес, сыртқы нарыққа да бейімделуге тиіс. Олардың экспорттық әлеуетін арттыру үшін қол¬дауды күшейту керек - деді Қ.К.Тоқаев.

Бүгінде Түркістан облысында кәсіпкерлерді қолдау бағытында көптеген жобалар жүзеге асуда.

Бір ғана Төлеби ауданында биыл бизнес идеяларды іске асыруға арналған мемлекеттік гранттар бойынша 70 азаматты жұмыспен қамту жоспарланған. Бүгінде ауданда 35 азамат грантқа ие болып, өз кәсібін бастаған. Басым бөлігі мал мен құс шаруашылығы, тігін және кондитер салалары бойынша.

Солардың бірі – Рита Курабанова. Ол бәліш, торт пісірумен айналысады. Төлебилік кәсіпкердің кондитерлік өнімдеріне сұраны жоғары. Айтуынша, «Бастау бизнес» жобасы аясында кәсіпкерлік орталығында 2 ай білім алған. Бизнес жоспарын ойдағыдай қорғап, берілген грант қаржысына торт пісіруге арналған пеш пен кәсіби миксер сатып алған.

- Торт пісіру ісіне қатты қызықтым. Тәттілерді өз қалауымша сәндеп, дәмін келтіріп өз отбасымды қуантқым келді. Бірақ, оны үйде пісіретін арнайы пешім, қажетті құрал-жабдықтарым болмады. Торт пісіру ісіне бар жан-дүниеммен кірісемін. Бұл іс өзіме ұнағандықтан хоббиді кәсіпке айналдырдым. Тапсырыс берушілердің көңілдерінен шығудамын, - деді кәсіпкер