«Қазақстан қор биржасы» АҚ (KASE) басқарма төрағасы лауазымына Әділ Мұхамеджановтың тағайындалғанын мәлімдеді.

Әділ Мұхамеджанов Қазақстанның қаржы саласында 20 жылдан астам уақыт жұмыс істеген. Өзінің кәсіби қызметін 2002 жылы Ұлттық банктің монетарлық операциялар департаментінде бастап, бірнеше жауапты лауазымдарда еңбек еткен. Соның ішінде департамент директорының орынбасары қызметін атқарып, ақша-несие саясатын жүзеге асыру мен Ұлттық қор активтерін басқаруға жауапты болған.

Кейінірек Ә.Мұхамеджанов KASE басқарма төрағасының орынбасары болып жұмыс істеп, сауда-саттық және клиринг қызметін бақылаумен және үйлестірумен айналысқан. Оның жетекшілігімен валюта нарығында сауда-клиринг жүйесі іске қосылды.

Бүгінгі тағайындауға дейін Әділ Мұхамеджанов «Бағалы қағаздардың орталық депозитарийі» АҚ басқарма төрағасы қызметін атқарды.

Оның жетекшілігімен 2022–2024 жылдарға арналған орталық депозитарийді дамыту стратегиясы, оның ішінде ауқымды цифрлық трансформация және жергілікті депозитарлық хаб ретінде даму бастамалары табысты жүзеге асырылды.