Биыл «Бекзат» мөлтек ауданының 1994 жылы туған ер азаматтары бас қосып, 4 бөлмелі баспана тұрғызды. Ішін қажетті тұрмыстық техникамен жабдықтап, мұқтаж отбасыға табыстады деп жазады ҚазАқпарат. 

- Құрылыс жұмыстарын түгелдей өзіміз жүргіздік. Көпшілікпен жиналған қаражатқа үйді заман талабына сай етіп салдық. Ақылдаса келе, жаңа үйді көпбалалы отбасыға сыйлауды жөн санадық. Игі іске ат салысқан барлық азаматтарға, демеушілерге рахметімізді айтамыз. Бұл осы күнге дейін мұқтаж отбасыларға арнап салынған 18-үй, - деді игі істі ұйымдастырушылардың бірі Бексұлтан Әбішов.

Бекзаттық жастардың салған үйі Асылбековтар отбасына табысталды. Отағасы Құрбанәлі мен жары Мөлдір 9 перзентімен бірнеше жылдан бері пәтер жалдап күнелтіп келген. Өз кезегінде қайырымды істің шарапатын көрген отбасы жақсылыққа жаны құмар жандарға алғысын білдірді.