Цифрлық даму, инновациялар және аэроғарыш өнеркәсібі министрлігі Илон Маск интернет-спутнигіне шектеулер себебін түсіндіріп, ведомство қандай балама ұсынып отырғанын атады деп хабарлайды ҚазАқпарат.

Өткен жылдың соңында Цифрлық даму министрлігі Thuraya, Iridium, Inmarsat және Starlink спутниктік байланыс жүйесін жеткізуге және пайдалануға тыйым салу көзделген бұйрық жобасын жария еткен болатын.

Осыған орай агенттік жолдаған ресми сауалға жауап берген ведомство қабылданған шара ұлттық қауіпсіздікке төнетін қатермен байланысты екендігін алға тартады. Өйткені, Қазақстан заңына сәйкес, шетелден басқаралатын байланыс желісін пайдалануға тыйым салынған. Аталған бұйрық жобасы бүгінде қосымша талқыланып жатыр.

Starlink орнын кім басады ?

Еліміз шетелдік спутник жүйесі шектелетіндігіне байланысты балама нұсқалар қарастырып жатыр.

- Шалғай аудандарды байланыспен қамтамасыз ету мәселесін шешу үшін балама нұсқа ретінде отандық «KazSat» спутник желісі мен Қазақстан аумағында байланысты басқару орталығын салған OneWeb халықаралық компаниясы қарастырылып жатыр. Ілкі жобаа аясында ауыл мектептеріне Интернет ұсыну үшін Starlink технологиясын қолдану ұйымдастырылды, - деді Цифрлық даму министрлігіне қарасты Телекоммуникация комитетінен.

Мұнан бөлек, министрлік ғарыштық технология және спутниктік байланыс саласындағы ынтымақтастық үшін Amazon Kuiper Commercial Services LLC компаниясымен меморандумға қол қойды. Қытайлық Shanghai Spacecom Satellite Technology Co., Ltd компаниясымен Қазақстаан аумағында басқару орталығын салу бойынша келіссөз жүргізіліп жатыр.

- Қазақстан Республикасының Үкіметі «Қолжетімді Интернет» ұлттық жобасын бекіткенін қосымша атап өтеміз. Оның аясында халықты Интернетке қолжетімділікпен қамтамасыз ету үшін қажетті инфрақұрылым салу жоспарланған, - деді ведомстводан.