Түркістан облысында «Цифрлық Қазақстан» мемлекеттік бағдарламасы аясында іске қосылған «Белсенді азамат» жобасының 109 бірыңғай байланыс орталығы 24/7 форматында тәулік бойы қоңыраулар қабылдауда. Цифрландыру, мемлекеттік қызметтер көрсету және архивтер басқармасының мәліметінше, республика бойынша 2020 жылдың 16 наурызынан бастап төтенше жағдай енгізілгендігіне байланысты 109 call-орталығы қазіргі уақытқа дейін облыс тұрғындарынан екі мыңнан аса қоңыраулар қабылдаған, деп хабарлайды RGMEDIA.KZ ақпарат агенттігі.

– Байланыс орталығына келіп түскен арыз-шағымдардың басым көпшілігі коронавирус пандемиясына қарсы жасалатын профилактикалық жұмыстарға, азық-түлік бағалары мен әр түрлі коммуналдық салаға қатысты болып отыр.

Сонымен қатар, облыс тұрғандарының мәселелерін жылдам шешу мақсатында, келіп түскен арыз-шағымдар «Белсенді азамат» жобасына бағытталып отыр. Бұл портал арқылы түскен шағымдар өңделіп, тұрғындар өтініштеріне жедел жауап алады, – дейді облыстық Цифрландыру, мемлекеттік қызметтер көрсету және архивтер басқармасының Елнұр Өтебаев.

«Белсенді азамат» – Түркістан облысында әр түрлі салаларда жасалып жатқан іс-шараларды халыққа дауысқа қою, шағымдар мен ұсынымдар, басшының қабылдауына электронды тіркелу, мемлекеттік қызметкерлердің жұмысын халық бағалайтын арнайы оңтайландырылған платформа.