Түркістан облысы полицейлері деструктивті діни ағымды ұстанушыдан Қызыл кітапқа енген құстарды тәркіледі. Бұл туралы Түркістан облысы Полиция департаментінің баспасөз қызметіне сілтеме жасап RGMEDIA.KZ ақпарат агенттігі хабарлады.
Сайрам АПБ-ның кезекші бөліміне аудан тұрғынының бірінің үйінде дала қыраны сияқты жабайы құстар бар екендігі туралы хабарлама келіп түсті. Экологиялық қылмыстардың алдын алу жөніндегі жедел-профилактикалық іс-шаралар барысында Сайрам АПБ қызметкерлері аталған тұрғынның сарайынан екі құсты тапты. Олар ҚР "Қызыл кітабына" енгізілген екі дала қыраны болып шықты. Сондай-ақ, полицейлер күдіктінің діни-деструктивті ағымды ұстанушы екенін анықтады. Ер адам "қолхатта".
Қазіргі уақытта ҚР ҚК-нің 339-бабы "Сирек кездесетін және құрып кету қаупі төнген, сондай-ақ пайдалануға тыйым салынған өсімдіктер мен жануарлар түрлерін, олардың бөліктерін немесе дериваттарын заңсыз пайдалану" бойынша сотқа дейінгі тергеу амалдары жүргізілуде. Айғақты зат ретінде алынған Дала қырандары Шымкент қаласының хайуанаттар бағына жіберілді. Тәртіп сақшылары ер адам "Қызыл кітапқа" енген құстарды қандай мақсатта ұстағанын анықтауда.
Түркістан облысының полиция қызметкерлері азаматтарға ҚР "Қызыл кітабына" енгізілген сирек кездесетін жануарларды заңсыз ұстағандар 3 мың АЕК дейінгі айыппұл немесе 3 жылға дейінгі мерзімге бас бостандығынан шектеу немесе айыру түріндегі қылмыстық жауапкершілік қарастырылғанын ескертеді.
