Еліміздің ең жас Мәжілісімендері Мәди Ахметов пен Тілектес Адамбеков Шымкентте арнайы ат басын бұрды. Іс-сапар барысында халық қалаулылары «Nur Otan» партиясы Шымкент қалалық филиалы жанындағы «Жастарды қолдау» кеңесінің отырысына қатысты. Жиын барысында депутаттар жас кәсіпкерлермен тілдесіп, олардың талап-тілектерін тыңдады.

Кеңес отырысына Жастарды қолдау жөніндегі республикалық қоғамдық кеңестің төрағасы Мәди Ахметов арнайы қатысты. Төраға аймақтағы  айтулы мәселелерге құлақ түріп, өз ойын ортаға салды. Жиында "Еңбек", "Бизнестің жол картасы", "Нұрлы жер" мемлкеттік бағдарламалардың орындалуы, азаматтық белсенділік, жастарды жұмыспен қамту және бизнесті өркендету сынды тақырыптар қаралды.

Сондай-ақ, халық қалаулылары М.Әуезов атындағы ОҚУ-дың жаңадан бой көтерген жатақханасының құрылысымен танысты. 5 қабатты студенттер үйіне депутаттар оң баға берді. Жауаптылардың айтуынша, жатақхана ағымдағы жылдың қыркүйек айында пайдалануға беріледі деп жоспарлануда.

Мәжілісмендер мен қалалық кеңес мүшелері іс-сапарын Асар-2  тұрғын алабында жалғастырды. Ондағы жас отбасылар мен жастарға берілген пәтерлердің сапасымен танысып, тұрғындармен тілдесті. Өз кезегінде тұрғындар да мұқтаждықтарымен бөлісті.

Жергілікті депутаттар тұрғындар өтініші қыркүйек айында орындалып, мұнда жаңа спорт алаңшасы салынатындығын айтты. Елордалық өкілдер үшінші мегаполисте көтерілген мәселелер жерде қалмайтындығын жеткізді.