Шымкентте  көпқабатты тұрғын үйлерде кондоминиум объектілерін басқарудың жаңа реформасы – Мүлік иелерінің бірлестігі (МИБ)  немесе Жай серіктестіктер (ЖС) құрылуда. Бұл туралы Шымкент қалалық орта сапасы және бақылау басқармасының басшысы Ғалымжан Өтенбаев баспасөз брифингінде мәлімдеді. Басқарма басшысы сондай-ақ «Бір үй, бір бірлестік, бір есепшот» қағидаты бойынша жаңа жүйеге көшу қарқынды жүргізіліп жатқанын айтты. 

Жүйенің басты артықшылығы – кондоминиум нысандарын басқару органына меншік иелерінің тарапынан бақылауды қамтамасыз ету, басқару органдарының қызметінің ашықтығын арттыру, ортақ мүлкіне күрделі жөндеу жүргізудің жаңа тетігін енгізу.

– Тұрғын үй коммуналдық шаруашылығын жаңғырту бағдарламасы  бойынша қала әкімдігі тарапынан жобалық кеңсе іске қосылып, медиа жоспар және жол картасы бекітілген. Тұрғындарға  тұрғын үйдің басқару жүйесін таңдауы, яғни мүлік иелерінің бірлестігі (МИБ) немесе жәй серіктестіктің (ЖС) оң әсер беретіндігін түсіндіру бойынша аудан әкімдіктері тарапынан үгіт-насихат жұмыстары жүргізілуде. 2021 жылдың 29 сәуірдегі жағдай бойынша қалада 43 мүлік иелерінің бірлестігі және 143 жәй серіктестік тіркелген, –  деді жиында Ғ. Өтенбаев. 

Көпқабатты тұрғын үйлерге мүлік иелерінің бірлестігін (МИБ) немесе жәй серіктестікті (ЖС) құруды жоспарлаған азаматтар тұрғылықты жері бойынша тиісті аудан әкімдіктеріне жүгіну керек дейді мамандар.