Аудандық аурухананың неврология және гинекология бөлімдері толығымен күрделі жөндеуден өтіп, ел игілігіне пайдалануға берілді. 

Бүгін аудандық ауруханаға аудан әкімі Н.Байғұт, аудандық мәслихат хатшысы С.Сейсенбаев және «Nur Otan» партиясының аудандық филиалы басшысының орынбасары Қ.Еркебаев арнайы барып, құрылысы аяқталған және құрылыс жұмыстары жүріп жатқан ғимараттарды аралады. Аралау барысында аудан басшысы бас дәрігер мен құрылысқа жауапты мердегерге құрылыс жұмыстарының сапалы әрі мерзімінде аяқталуын қатаң бақылауда екендігін айтып, Қ.Еркебаевқа партия тарапынан да бақылауды күшейтуді тапсырды.   Құрылысы аяқталған ғимараттың есік терезелері мен едені толығымен ауысып, ішкі және сыртқы әрлеу жұмыстары мен электр, су жүйелері толығымен жаңартылды. Ғимараттың сыртқы бөлігі жел мен жаңбырға төзімді арнайы жабындымен қапталып, мүмкіндігі шектеулі жандардың жүріп тұруына барлық жағдай жасалынған.

Сонымен қатар, аурухананың қалған ғимараттары да биыл толығымен күрделі жөндеуден өтпек. Бүгінгі таңда перзентхана мен орталықтандырылған асханасының жөндеу жұмыстары 85 пайызға аяқталған. Қос нысан 2021 жылдың маусымында пайдалануға берілмек. Ал, бас ғимаратының жөндеу жұмыстары жыл аяғына дейін ақталуы жоспарлануда. 

Түлкібас ауданы әкімдігінің баспасөз қызметі