Түлкібас ауданында COVID-19 пандемиясының таралмауы үшін қорғану шаралары күшейтілді. Аудандағы  адам көп шоғырланатын "Орталық балалар саябағы", "Арбат" алаңы "Тұңғыш Президент" саябағында залалсыздандыру жұмыстары жүргізілуде.

       Бұл шаралар соңғы тәуліктерде коронавирустық инфекция бойынша қалыптасқан күрделі жағдайға байланысты жасалып жатыр.  Түркістан облысы коронавирустық инфекцияның таралу қарқыны бойынша "сары" аймаққа енді. 18 шілдедегі жағдай бойынша өңірде COVID-19 ауруының 176 жағдайы тіркелген. Осындай мәліметтер осы аптада облыс әкімі Өмірзақ Шөкеевтің төрағалығымен өткен аппараттық кеңесте қаралды. 

Облыстық қоғамдық денсаулық сақтау басқармасының басшысы Марат Пашимовтың айтуынша, қазіргі уақытта 958 адам коронавирустық инфекциядан емделуде, оның ішінде 916 адам инфекциялық стационарларда, 42 адам карантиндік стационарларда және 158 адам үй карантинінде. 

"Қазіргі уақытта Түркістан облысы КВИ ауруының көрсеткіші бойынша "сары" аймаққа көшті. Егу науқаны басталғаннан бері 505 675 адам вакцинаның бірінші компонентімен егілді. Екінші компоненті - 315 226 адам. Бүгінгі күні облыс бойынша 128 егу пункті жұмыс істейді. Сондай-ақ, өңірде 14 ПТР-зертхана, оның ішінде 10 мемлекеттік ПТР зертхана жұмыс істейді. Өткен тәулікте зертханаларда 1 347 адам тексерілді. Облыс бойынша 2020 инфекциялық, 300 карантиндік және 315 реанимациялық төсек - орын бар", - деді М.Пашимов.