Президент Қасым-Жомарт Тоқаев халыққа арнаған былтырғы Жолдауында әлеуметтік маңызы бар азық-түлік тауарларымен өзімізді толық қамтамасыз ету, миллиондаған ауыл тұрғындарының табысын арттыру, еңбек өнімділігін екі жарым есе көбейту, агроөнеркәсіп кешені өнімінің экспортын екі есе арттыру міндеттерін жүктеген болатын.   

Осы тапсырмаларды орындау бағытында Түркістан облысында  «Кең Дала» бағдарламасы аясында «Оңтүстік» аймақтық инвестициялық орталығы ЖШС арқылы 3 ай ішінде 27 717 га егістік алаңымен жалпы сомасы 1 млрд. теңгеге 21 жоба қаржыландырылды. Осылайша, аталған бағдарлама бойынша «Аграрлық несие корпорациясы» АҚ бөлінген қаражат толық игерілді.

Түркістан облысы әкімінің баспасөз қызметінің хабарлауынша, жалпы, қаржыландыру Түркістан облысының 8 қаласы мен ауданына бағытталды. Қаражат бидай, жүгері, көкөніс, бақша, мақта және майлы дақылдарды өсіріп, дамытуға арналады. Айта кету керек, «Кең Дала» бағдарламасы көктемгі егін және жинау жұмыстарын жүргізу үшін агроөнеркәсіптік кешен субъектілерін қаржыландыруды қарастырады.

Ауыл шаруашылығы өндірушілері 2021 жылғы көктемгі егін және жинау жұмыстарына тиімді төмендетілген мөлшерлемемен (5%) несие ресімдеуге мүмкіндік алады. Бағдарлама аясында кепілдікті қамтамасыз ету бойынша қатаң талаптар жоқ. Сондай-ақ шаруаларға жылдық маусымдылықты ескере отырып (15.11.2021 жылға дейінгі мерзімге), қарыздарды өтеу бойынша неғұрлым икемді шарттар беріледі.