Республикалық маңызы бар Шымкент қаласы бүгінде бай тарихымен, көрікті мекендерімен ғана емес, сонымен қатар жылыжайлардың көптігімен де мақтана алады. Көкөніс пен жеміс-жидектің түр-түрін өсіретін жергілікті шаруалар жылыжай ісін әбден меңгерген. 

Бүгін Шымкент қаласының әкімі Мұрат Әйтенов ауылшаруашылығы бағытында биыл іске қосылған нысандардың жұмысымен танысып қайтқан болатын. Солардың бірі Қаратау ауданы, Алматы тас жолында орналасқан «AgroPark» ШҚ жылыжай кешені биыл жүзеге асқан ірі жобалардың бірі.

5,2 гектар аумақта орналасқан жылыжай кешені жылына 1500 тонна қызанақ пен қияр өндіреді. Тартылған инвестиция көлемі - 1 300 млн теңге. Кәсіпкерге 331,5 млн теңге мемлекеттік қолдау көрсетілген. 

Аграрлық өнімдер жылына екі мәрте жиналады Кешенде қажетті климаттық ахуал мен топырақ құнарлығын сақтау процесстері автоматтандырылған.  

Шаруа қожалығы 45 адамды тұрақты жұмыспен қамтып отыр. Персонал аграрлық технологияны сақтау мәселесі бойынша дайындықтан өткен.

Қала әкімі Шымкентте тамақ өнеркәсібін дамытуға барлық мүмкіндіктер бар екенін айтты. Ішкі нарықты отандық азық-түлік өнімдерімен қамту маңызды міндет екеніне көңіл бөлген Мұрат Дүйсенбекұлы, сала жетекшілеріне бұл бағыттағы жұмыстарды жүйелі түрде жалғастыруды тапсырды.