Шымкент қаласы күннен-күнге дамып, өсіп-өркендеп келеді. Сәйкесінше қалаға келуші туристер саны да артқан. Оларға жайлы жағдай, қолайлы орта жасау - басты назарда. Туристер өте кірпияз болатыны белгілі. Сондықтан оларға әрқашанда сапалы қызмет керек. Олар бұны өте жоғары бағалайды.

Осы орайда Шымкент қаласының Әл-Фараби ауданында демеушілер есебінен адам көп шоғырланған 6 орынға ауызсу бұрқақтары орнатылды.  Биыл 10 орынға ауызсу бұрқағын орнату жоспарланған. 

Мегаполис тұрғындары мен қонақтары – Арбат демалыс саябағында, Гүлжан аялдамасындағы «Қызғалдақтың» жанында, Орталық саябақта, Қонаев пен Иляев көшелерінің қиылысында,  «Моцарелла» мейрамханасының  алдында және Гипер хаус сауда үйінің тұсында ауызсудан ішіп, шөлін қандыра алады. 

Тұрғындардың алаңсыз су ішуі үшін онда суға арналған сүзгі (АКВАФОР фильтр) қойылды. Тіршілік көзі бей-берекет ақпайды, тек қажет кезде ғана арнайы батырманы басып пайдалануға арналған. Алдағы уақытта қалада тағы 4 ауызсу бұрқағын іске қосу жоспарланып отыр.