Түркістан қаласы таза ауыз сумен толық қамтылады. Бұл туралы Түркістан қалалық әкімдігі хабарлады. 

Бүгінгі таңда, облыс орталығы ауыз сумен Кентау қаласындағы Біресек су кен орынынан 600 дм құбырмен сағатына 1 590 м3 және Мырғалымсай ескі кен орнынан 800 дм құбырынан сағатына 3 200 м3 мүмкіндігімен қамтылуда. 

Қазір аталған құбырлар арқылы сумен қамтылу Шобанақ елді мекеніндегі 40 000 м3 резервуарынан және әкімшілік – іскерлік орталығының жоғарғы жағынан салынып жатқан 16 000 м3 су жинау резервуарынан құйылып, тұрғындарға жеткізілуде.

Бұдан бөлек, «Түркістан Су» МКК меншігіндегі 21 су ұңғымасы және «Арыс теміржолы» ЖШС-нің меншігіндегі 14 су ұңғымасы арқылы қала аумағына су жіберілуде.

Нәтижесінде қала аумағының таза ауыз сумен қамтылуы 98,5 %-ы құрап отыр. Қалған аумақтарды да таза ауыз сумен қамтамасыз ету үшін Мақта зауытының шағын ауданын, І-ІІ шағын аудандарымен Иассы және Шавгар шағын аудандарының су құбыры желілерін реконструкциялау жұмыстары жүргізілуде.Сонымен қатар, Н.Төреқұлов көшесі аумағындағы тұрғын үй массивін ауыз су жүйесімен қамтамасыз ету құрылысы жүйелі жүзеге асырылуда.

Аталған жұмыстар аяқталғанда шаһар толығымен таза ауыз сумен қамтылады.