Үшінші мегаполис - жасыл желекке орнаған, экономикасы дамыған, әлеуеті жоғары, көне әрі жаңарған туристік және аграрлы қала. Замануи келбеті жарасқан шаһарда ауылшаруашылық саласында да ауыз толтырып айтарлық жетістіктер жетерлік. Мәселен  биыл қалада ауыл шаруашылығы дақылдары 29,3 мың га жерге егілді. Көрсеткіш өткен жылмен салыстырғанда 1,4 мың гектарға артық.

Егін жинау жұмыстарына 791 бірлік ауыл шаруашылығы техникасы жұмылдырылды, 7 жаңа трактор сатып алынды. Оның ішінде 3 дана шетелден және 4 дана отандық трактор алынды. Инвестициялық субсидиялау бағдарламасымен 2 техника субсидияланды. 

Пандемияға қарамастан диқандардың орасан еңбегінің нәтижесінде Шымкентте сегіз айда 80 мың тонна өнім жиналды, оның ішінде дәнді дақылдар - 14,4 мың тонна, майлы дақылдар – 3 мың тонна, көкөніс, бақша - 42,7 мың тонна, картоп - 3,1 мың тонна, мал азықтық дақылдар - 16,8 мың тонна. Бұл жоспардың 93,7 пайызы орындалғанын көрсетеді. Барлық астықтың сапасы жоғары және барлық талаптарға сай келеді. 

Жиналған өнімнің көлемі 28,5 млрд. теңгеге жетті. Жыл соңына дейін 29,3 мың гектар егіс алқабынан  жалпы 85,4 мың тонна өнім жиналса, жалпы өнім көлемі 37 млрд. теңгеге жетеді деп жоспарланып отыр.