Әр түрлі салада қызмет еткен 30-дан астам шардаралық ардагер түрленген Түркістан қаласын тамашалады. Қариялар ең алғашқы зияратын  Арыстанбаб кесенесінен бастап, Отырар қалашығын, Керуен сарай, Ясауи кесенесін, Фараб кітапханасын, Алатау медиа орталығын, облыс әкімдігін, Конгресс холл және басқа да Түркістан шаһарынан жаңадан бой көтерген нысандарды аралады. Бұл туралы Түркістан облысы әкімінің баспасөз қызметі хабарлады. 

Сан ғасырлық тарихы бар Түркістан өлкесінің өткені мен бүгіні туралы шежіре шертетін көрмеге қатысты. Түрленіп, түлеген Түркістан қаласының бүгінгі келбетін таңдана да тамсана тамашалап, саяхаттан рухани серпіліп қайтты.

Елбасының «Болашаққа бағдар: Рухани жаңғыру» атты бағдарламалық мақаласында «Еліңді құрметтеу, туған өлкенің тарихын танудан, адамдарын ардақтаудан басталады» – деп атап көрсеткен болатын. Елдің болашағы үшін барын салып аянбай еңбек еткен ардагерлерге құрмет көрсетіп, оларды ұлықтау – бүгінгі ұрпақтың борышы.

Түркістан облысы әкімінің тапсырмасына сәйкес, барлық аудан, қала ардагерлері арнайы ұйымдастырылған сапар аясында жаңарған Түркістанды тамашалауда. Жаңарған Түркістанға қонақ болып келетін ардагерлер - аймақтың, еліміздің әлеуметтік-экономикалық дамуына үлкен үлес қосқан білім, мәдениет, ғылым, өндіріс және және басқа да түрлі салаларда жетекшілік еткен білікті ақсақалдар. Оларды карантин талаптарын қатаң сақтай отырып, Түркістанға алып келіп, қаланы аралатуға аудан, қала басшылары жауапты.