Жұлдызай тәжірибе жинап жүр

Қысқаша

Айта кетсек, биыл қоғамдық жұмыспен 2 805 адам түрлі мекемелер мен кәсіпорындарға жолданды. Жоспар артығымен орындалып, уақытша жұмысқа жолдама беру әзірге тоқтатылған.

Screenshot_4.png

Еңбекке қабілетті азаматтардың жұмыссыз отыруы – ел экономикасының төмендеуіне, халықтың әл-ауқатының әлсіреуіне айтарлықтай әсер етеді. Әсіресе жастардың қолқусырып отыруы жақсы емес. Себебі олардың  нағыз жанып тұрған, өз-өзін көрсететін, елге пайдасын тигізетін шақтары. Ал жастарға жүмыс істеу үшін тәжірибе керек. Республикада жастарды уақытқа жұмыспен қамтып, үлкен өмірге қадам басуға жол ашып отырған «Жастар практикасы» бағдарламасы сәтті жүзеге асып келеді. Бағдарламаға қатысушылардың ішінде шымкенттік жастардың да үлесі басым. 

Солардың бірі – Жұлдызай Жамал.  Ол 2020 жылы Шымкент қаласындағы «SILKWAY» Халықаралық университетін бастауыш пәні мамандығы бойынша тәмамдаған.

Жоғары оқу орнын бітірген жас маман былтыр қалалық жұмыспен қамту орталығында «жұмыссыз» ретінде тіркеліп, көп ұзамай «Жастар практикасы» бойынша Д.Менделеев атындағы №15 мектеп-лицейіне жолданды.  Содан соң, бағдарламаның мерзімі аяқталған соң, биыл ақпан айында аталған мектеп-лицейіне бағдарламаның үшінші бағыты шеңберінде «Қоғамдық көмекші» ретінде жұмысқа тартылып, тәжірибе жинақтауда.

– Мемлекеттік бағдарламаның тиімділігі мол. Оқу бітірген соң мамандығым бойынша «Жастар практикасы», одан соң қазір «қоғамдық көмекші» ретінде уақытша жұмысқа орналастым. Жинаған тәжірибенің арқасында алдағы уақытта тұрақты жұмыс табатыныма сенімдімін, – дейді 23 жасар бағдарлама қатысушысы.

Қоғамдық жұмыстарға қатысуға мүмкіндігі бар азаматтар – жұмыссыздар⠀(халықты жұмыспен қамту орталығында алты айдан астам есепте тұрған, жұмысынан айырылған жағдайда әлеуметтік төлем алмайтын жұмыссыздар),⠀денсаулыққа зиян келтірмейтін және оқу үдерісін бұзбайтын жұмыстарда жазғы демалыс кезеңінде студенттердің және жалпы білім беретін мектептердің жоғары сынып оқушылары,⠀жұмыстың тоқтап тұруына байланысты жұмыспен қамтамасыз етілмеген азаматтар.  Уақытша жұмыс орны болып есептелінетін «Қоғамдық жұмыс» –жұмыскерді алдын-ала кәсіптік даярлауды талап етпейді және әлеуметтік бағытқа ие. 

Айта кетсек, биыл қоғамдық жұмыспен 2 805 адам түрлі мекемелер мен кәсіпорындарға жолданды. Жоспар артығымен орындалып, уақытша жұмысқа жолдама беру әзірге тоқтатылған.


    A+
Уақыты: 2021-05-24  Айдарша: Өңір
TAG: