Бердіқожаев тың тәсілмен ота жасады

Қысқаша

Дәрігердің айтуынша, ота сәтті жасалып, қан кету көзі жойылған. Әрі қарай науқасқа емдеуді толық жүргізуге болады.

Screenshot_6.png

Қазақстан Республикасының денсаулық сақтау саласын дамытудың 2020-2025 жылдарға арналған мемлекеттік бағдарламасында медициналық инфрақұрылымды жақсарту, ауру-сырқаудың деңгейін азайту және қазақстандықтардың орташа өмір сүру ұзақтығын 2025 жылға қарай 75 жасқа дейін жеткізу көзделген. Соның ішінде бүгінде тұрғындар арасында өлім-жітімнің көбеюіне себепші болып отырған инсульттің алдын алу да бағдарламада көрсетілген. 

   Шымкентте аталмыш ауруды емдеудің тың тәсілі қолданылуда. №2 қалалық ауруханаға өткен жылы  соңғы үлгідегі ангеограф аппараты алынған болатын. Бұрын басына қан құйылған науқасқа бас сүйегін ою арқылы ота жасалса, жаңа аппаратпен миға тамыр жолдары арқылы ота жасалатын болды. Алғашқы отаны  таяуда Шымкент қаласына қоныс аударған білікті нейрохирург Мыңжылқы Бердіқожаев  жасады.

Жедел жәрдеммен ауруханаға түскен 57 жастағы әйел инсулть алған екен. 

- Науқас субарахноидальды қан құйылумен алғашқы аневризма-геморрагиялық инсультпен түскен. Оған мидың КТ-да-субарахноидты қан кету, КТ ангиографиясы жасалғанда - сол жақ ішкі каротид артериясының аневризмасы анықталды. Сондықтан шұғыл түрде жаңа биплан ангиографында рентгенэндоваскулярлық әдіспен, яғни бас сүйегін ашпай ота жасалды. Ангиографта КТ бақылау операциясы жүргізілді, - дейді білікті нейрохирург. 

Дәрігердің айтуынша, ота сәтті жасалып, қан кету көзі жойылған. Әрі қарай науқасқа емдеуді толық жүргізуге болады.

 Еске сала кетсек, Мыңжылқы Бердіқожаев жақында Шымкент қаласындағы №2 қалалық ауруханасының бас дәрігері қызметіне тағайындалған болатын. Мыңжылқы Сайлауұлы еліміздегі нейрохирругия саласын дамытып, әлемді мойындатқан білікті дәрігер. Алтын қолды хирург бүгінге дейін 5000-нан аса бас миының тамырларына жоғары технологиялық отасын жасаған.


    A+
Уақыты: 2021-04-07  Айдарша: Өңір
TAG: